Namrta Pradhan New Serial : ‘झी मराठी’ने त्यांच्या नव्या मालिकेची घोषणा केल्यानंतर आता ‘कलर्स मराठी’ वाहिनीने देखील एक नवीन मालिका लवकरच प्रेक्षकांच्या भेटीस येणार असल्याची बातमी दिली आहे. काही दिवसांपूर्वी ‘झी मराठी’ने ‘सावळ्याची जणू सावली’ या नवीन मालिकेची घोषणा करून उत्सुकता निर्माण केली होती. त्यानंतर ‘कलर्स मराठी’ने देखील आपल्या आगामी मालिकेचा दमदार प्रोमो प्रेक्षकांसमोर आणला आहे. ‘दुर्वा’ असं या नव्या मालिकेचं नाव असून, ही मालिका लवकरच प्रेक्षकांच्या मनावर अधिराज्य गाजवण्यासाठी सज्ज होत आहे. विशेष म्हणजे, ‘ठिपक्यांची रांगोळी’ या लोकप्रिय मालिकेतून घराघरात पोहोचलेली अभिनेत्री या नव्या मालिकेत पुन्हा प्रेक्षकांच्या भेटीला येणार आहे.
गेल्या वर्षी नोव्हेंबर महिन्यात ‘ठिपक्यांची रांगोळी’ या मालिकेचा प्रेक्षकांनी भावनिक निरोप घेतला. ‘स्टार प्रवाह’ वाहिनीवरील ही मालिका प्रेक्षकांच्या मनावर गारूड करून ठेवणाऱ्या लोकप्रिय मालिकांपैकी एक होती. या मालिकेने दोन वर्षांहून अधिक काळ प्रेक्षकांची मने जिंकली होती. एकत्र कुटुंब पद्धतीवर आधारित या मालिकेत कानिटकर कुटुंबाने प्रेक्षकांना आपलंसं केलं होतं. या कुटुंबातील शशांक, अप्पू, माई, दादा, विठू, सुवा, कूकी, पन्ना, बाबी आत्या अशी प्रत्येक पात्रं घराघरात पोहोचली होती आणि प्रेक्षकांच्या हृदयात स्थान निर्माण केलं होतं. आता, या मालिकेतील सुमनची भूमिका साकारलेल्या नम्रता प्रधान या गुणी अभिनेत्रीने प्रेक्षकांची मने जिंकली होती. आता ती पुन्हा एकदा नवीन मालिकेत प्रेक्षकांच्या भेटीस येणार आहे, याची बातमी नक्कीच प्रेक्षकांसाठी आनंदाची आहे.
Bigg Boss Marathi 5 Purushottam Patil : मला बिग बॉसच्या घरात अजून एक आठवडा संधी भेटली पाहिजे होती..
‘कलर्स मराठी’च्या आगामी ‘दुर्वा’ या मालिकेत नम्रता प्रधान झळकणार आहे. नम्रता प्रधानने या मालिकेचा प्रोमो आपल्या इन्स्टाग्राम स्टोरीवर शेअर करत एक साधं पण अर्थपूर्ण वाक्य लिहिलं, “अखेर.” यामुळे तिच्या चाहत्यांमध्ये उत्सुकता निर्माण झाली आहे. तिच्या सहकाऱ्यांनी आणि चाहत्यांनी तिला शुभेच्छा दिल्या आहेत, परंतु या प्रोमोमध्ये नम्रता प्रधानची झलक दिसलेली नाही. त्यामुळे ती या मालिकेत कोणत्या भूमिकेत झळकणार, याबद्दल उत्सुकता अधिकच वाढली आहे.
याचबरोबर, ‘दुर्वा’ मालिकेत अभिनेत्री रुमानी खरे आणि अभिनेता अंबर गणपुळे हे प्रमुख भूमिकेत दिसणार आहेत. त्याचप्रमाणे शिल्पा नवलकर आणि राजेंद्र शिसातकर हेही महत्त्वाच्या भूमिकांमध्ये असणार आहेत. या मालिकेत एका कुटुंबावर झालेल्या अन्यायाच्या प्रतिशोधासाठी लढणाऱ्या मुलीची कथा उलगडणार आहे. प्रेक्षकांना खिळवून ठेवणारी आणि भावनिक आवाहन करणारी अशी ही कथा असणार आहे.
नम्रता प्रधानच्या अभिनय प्रवासाबद्दल बोलायचं झालं, तर ‘ठिपक्यांची रांगोळी’ मालिकेपूर्वी ती ‘छत्रीवाली’ या मालिकेत झळकली होती. या मालिकेत तिने प्रमुख भूमिका साकारली होती आणि तिच्या अभिनयाने प्रेक्षकांची मने जिंकली होती. ‘छत्रीवाली’ मालिकेमुळेच नम्रताला नवीन ओळख मिळाली. त्यानंतर ती ‘मिसेस देशमुख’ या चित्रपटात झळकली, ज्यामुळे तिच्या अभिनयाची विविधता आणि क्षमता प्रेक्षकांसमोर आली.
नम्रता प्रधानची ‘दुर्वा’मधील भूमिका काय असेल, हे पाहणं निश्चितच रोमांचक ठरेल. तिच्या चाहत्यांसाठी ही बातमी नक्कीच आनंदाची आहे, कारण ती आपल्या मनातील प्रेक्षकांसाठी पुन्हा एकदा एका नवीन अवतारात येणार आहे. ‘दुर्वा’ ही मालिका प्रेक्षकांच्या मनात स्थान निर्माण करेल, अशी अपेक्षा आहे.