वनिता खरात हे नाव महाराष्ट्रातील प्रत्येक घराघरांत पोहचलं आहे. प्रेक्षकांना पोटधरुन हसायला लावणारी अभिनेत्री वनिता खरात, आता प्रेक्षकांच्या मनात दरारा निर्माण करेल की काय असा प्रश्न उपस्थित झाला आहे. कारण वनिता खरातला यापूर्वी कधीही न पाहिलेल्या, खलनायिकेच्या भूमिकेत पाहायला मिळणार आहे. अर्थात, ती या भूमिकेमधून देखील प्रेक्षकांची मनं जिंकून घेईलच.
‘सन नेटवर्क’च्या ‘सन मराठी’ वाहिनीवरील ‘सुंदरी’ या मालिकेचे नवीन पर्व नुकतेच सुरु झाले आहे. या नवीन पर्वात सुंदरीच्या आयुष्याचा नवीन प्रवास सुरु झाला आहे आणि तिचा हा नवीन प्रवास आव्हानात्मक असणार आहे. अनेक अडचणींना सुंदरीला अगदी धीराने सामोरं जावं लागणार आहे, त्यातील एक अडचण म्हणजे ‘साहेब’.
‘साहेब’ या नावाप्रमाणेच त्या व्यक्तीचं व्यक्तीमत्व देखील भारदस्त, बेधडक, जिगरबाज असणार ना. अगदी तसंच आहे, पण ही व्यक्ती पुरुष नसून स्त्री आहे आणि ‘साहेब’ या खलनायिकेची भूमिका वनिता खरात साकारत आहे. नुकताच वनिताच्या भूमिकेचा प्रोमो सोशल मिडीयावर प्रदर्शित झाला असून वनिताला या अनोख्या भूमिकेत पाहणं प्रेक्षकांसाठी सरप्राईज असणार हे नक्की.
तू जरी असली कलेक्टर तरी कायदा हा साहेबाचा चालतो, या दमदार डायलॉगमुळे वनिताच्या भूमिकेचा अंदाज प्रेक्षकांना आलाच असेल. आता साहेब आणि सुंदरी समोरासमोर आल्यावर नेमकं काय होणार, हे पाहण्यासाठी नक्की बघा ‘सुंदरी’ सोमवार ते शनिवार रात्री १० वाजता फक्त ‘सन मराठी’ वाहिनीवर.
