Abeer Gulal off Air : कलर्स मराठीवर सध्या गाजत असलेली मालिका ‘अबीर गुलाल’ लवकरच संपणार असल्याची चर्चा अभिनेता अक्षय केळकरच्या एका पोस्टमुळे सुरू झाली आहे. या मालिकेने प्रेक्षकांमध्ये चांगली लोकप्रियता मिळवली असून, मे महिन्यात याची सुरुवात झाली होती. मालिकेतील प्रमुख पात्रे अगस्त्य, श्री आणि शुभ्रा यांच्या त्रिकोणी प्रेमकथेला प्रेक्षकांनी भरभरून प्रेम दिलं आहे. सध्या मालिकेत श्री आणि अगस्त्य आपल्या लग्नानंतरची पहिली दिवाळी साजरी करत आहेत. तर दुसरीकडे, शुभ्राचे अगस्त्यशी लग्न मोडल्यावर ती त्याच्या भावाशी म्हणजे श्रीशी लग्न करून आलेली असल्याने तिच्या मनात असलेली नाराजी आणि ताण मालिकेत रंगवला जात आहे.
अक्षय केळकरने इन्स्टाग्राम वर केली खळबळजनक पोस्ट !
अशा नाट्यमय वळणावर असलेल्या या मालिकेबाबत नुकतीच एक महत्त्वाची चर्चा सुरू झाली आहे. अक्षय केळकरने आपल्या इन्स्टाग्राम पोस्टमध्ये ‘अगस्त्य’ या त्याच्या भूमिकेतील काही फोटो शेअर करताना दिलेलं कॅप्शन चर्चेचं कारण बनलं आहे. त्याच्या कॅप्शनमध्ये त्याने लिहिलं, “अगस्त्यच्या रुपातील काही शेवटचे दिवस. ‘अगस्त्य’ला भरभरून प्रेम दिल्याबद्दल धन्यवाद. मला अगस्त्यची भूमिका दिल्याबद्दल कलर्स मराठीचे मनापासून आभार.” त्याच्या या शब्दांतून मालिकेच्या शेवटाची सूचनाच मिळत असल्याचं अनेकांना वाटू लागलं आहे.
‘अबीर गुलाल’ मालिका संपल्यानंतर तिच्या जागी कोणती नवीन मालिका सुरू होईल, हे पाहणं आता प्रेक्षकांसाठी महत्त्वाचं ठरणार आहे. तसेच, अक्षय केळकरचं पात्र जर मालिका सोडत असेल, तर त्याच्या जागी कोणता नवीन अभिनेता किंवा पात्र दाखवणार, किंवा मालिका नव्या ट्विस्टसह पुढे नेली जाणार, याबद्दलही रसिकांमध्ये उत्सुकता आहे.